Ymgasglodd dros 25,000 o redwyr yng nghanol dinas Caerdydd ar ddydd Sul y 4ydd o Hydref wrth i’r hanner marathon ddominydu’r brifddinas am y 23ain tro. Dechreuodd y ras sy’n ymestyn 13.1 milltir tu fas i Gastell Caerdydd, gyda’r ffordd yn mynd a rhedwyr lawr i’r bae ac yna lan i Barc y Rhath cyn gorffen tu fas i Neuadd y Ddinas.
Yn ogystal â’r rhedwyr, ymgasglodd miloedd o gefnogwyr ar hyd strydoedd y ddinas wrth i deuluoedd, ffrindiau a thrigolion lleol gefnogi rhedwyr ar hyd y ffordd. Mae disgwyl i’r ras godi swm o dros £4 miliwn tuag at elusennau ac achosion da. Cafodd record cwrs y menywod ei thorri gan Joyciline Jepkosgei o Kenya wrth iddi hi ennill gydag amser o 1:05:40, a Gideon Kiprotich o Kenya enillodd ras y dynion gydag amser o 59:34.
Cwblhaodd nifer o eiconau Cymreig y ras, gydag enwau mawr o’r byd chwaraeon fel y cyn-chwaraewr pêl-droed Aaron Ramsey a’r cyn-chwaraewyr rygbi Shane Williams ac Adam Jones yn cymryd rhan. Fe wnaeth rhai o gyflwynwyr cyfarwydd S4C hefyd gymryd rhan, gydag Angharad Mair yn llwyddo i dorri record Brydeinig menywod dros 65 oed, a Heledd Cynwal yn rhedeg ochr yn ochr gyda’i thad a oedd yn rasio am y tro olaf yn 80 mlwydd oed.
Bu nifer o fyfyrwyr Prifysgol Caerdydd yn rhedeg yr hanner marathon hefyd, gan gynnwys Swyn Dafydd a Steff Davies. Dywedodd Swyn, sy’n astudio’r Gyfraith a’r Gymraeg: “Odd e’n brofiad amesing - hwn yw’r ail flwyddyn i fi gymryd rhan yn yr hanner marathon, a ma’r awyrgylch di bod yn wych ac mor gefnogol y ddau dro!”
Dywedodd ei bod hi wedi “Codi arian tuag at Am biwlans Awyr Cymru” eleni, a hefyd wedi rhedeg er mwyn “mwynhau’r profiad”.
Ychwanegodd, “Gan bo’ fi’n troi’n 21 mis yma, o ni’n meddwl bod e’n gyfle da i redeg 21km i droi’n 21!”
Rhedeg yn gystadleuol oedd Steff beth bynnag, wrth iddo geisio gosod PB newydd yn ystod y ras. Dywedodd Steff, sy’n astudio gwleidyddiaeth:
“Odd e’n brofiad arbennig iawn, llawer o ryddhad wrth groesi’r llinell. Fy nod oedd ceisio rhedeg mor gyflym â phosib gan redeg dros fy nghlwb rhedeg - Harriers Caerfyrddin.”
Fel nifer o deuluoedd eraill mae’n siŵr, dywedodd Steff bod aelodau o’i deulu wedi rhedeg gyda fe hefyd, gyda’i dad a’i chwaer yn cwblhau’r hanner marathon.
Er y bwrlwm a’r dathlu, newyddion trist oedd yn hawlio’r penawdau wythnos yma wrth i Run 4 Wales gadarnhau bod person wedi marw yn ystod y digwyddiad.
Gyda’r digwyddiad yn parhau i dyfu, gan ddenu miloedd o gefnogwyr a rhai o redwyr gorau’r byd, mae’n amser cyffrous i fyfyrwyr yn y ddinas sy’n awyddus i gymryd rhan. Mae’r balot ar gyfer hanner marathon blwyddyn nesaf bellach ar agor, felly os ydych chi’n ystyried rhedeg yn gystadleuol neu ar gyfer achos da, ewch amdani!
